प्रार्थना खनाल जोशी

१ .

खुसीको भाव थियो, स्वच्छ मन थियो

न स्पर्श न नजरमा  कुटिलपन थियो

प्रेमिल सद्भावका सधैँ सुखानुभूति थिए

स्नेहको  सुगन्ध टॉसिएको तन थियो ।

२.

परदेशीको जीवन हजुर टीठ लाग्दो छ

रहर मेटिन्न हजुर यता उमेर भाग्दो छ

माटो जन्मभूमिको, बाआमाको माया नबिर्सनू

पाको सन्ततिले पनि आमाको काख माग्दो छ।

३.

दूर्जन  मात्र  हैन  इष्ट  पनि चाहिन्छ

साथी मात्रै नखोज दुष्ट पनि चाहिन्छ

उन्नति र  प्रगतिमा  इख्याउने  शत्रुता

प्रेम छ र समाजमा रुष्ट पनि चाहिन्छ ।

४.

ठन्डी हुन्छ  हिउँदमा जानेर  नि  तातो खोज्छौ

समुद्रको परिवेश चिसो मानेर नि तातो खोज्छौ

नचाहिने ठाउँमा  नबुझी  किन  भैदिन्छौ  न्यानो

नशालु मातले  मातेर  नि  तातो  खोज्छौ  ।