लब खड्का

१.

झार हुनु भन्दा साग हुनु जाति कि कसो

सर्प हुनु भन्दा नाग हुनु जाति कि कसो !

जीवन बिती हाल्छ कालले जिती हाल्छ

रूवाइ हुनु भन्दा राग हुनु जाति कि कसो ।

२.

बालाले रेट्न सक्छ चुराले रेट्न सक्छ

खुकुरीले रेट्न सक्छ छुराले रेट्न सक्छ

प्रतिकार नगर्नुको अर्थ पिडा नहुनु पक्कै हैन

ब्यवहारले रेट्न सक्छ कुराले रेट्न सक्छ ।

३.

नखोज हुलचाल जनले पोल्न सक्छ

कमाए कुकर्मले धनले पोल्न सक्छ

संसार ढाट्ने भ्रममा आफुलाई नढाट्

एक दिन आफ्नै मनले पोल्न सक्छ ।

४.

देख्दा शासकको क्रूरता देश रन लाग्छ मलाई

देशद्रोही छानेर गोली ठोक्न मन लाग्छ मलाई

दैनिक विदेशीय पछि युवा निराश देखेर वृध्दा

आजकल गाँउ वस्ति सहर निर्जन लाग्छ मलाई ।

५.

सागर सुकाउने उदेश्य थियो नि सकिएन

पहाड झुकाउने उदेश्य थियो नि सकिएन

मनका हरेक इच्छा कहाँ पूर्ण हुँदो रैछ र खै

पीर लुकाउने उदेश्य थियो नि सकिएन।