कविता          

                सत्य र प्राप्तिको भ्रम

                                                          ठाकुर बेलवासे

पुग्नु कही छैन्

पुगें भन्नु केही क्षणको भ्रम मात्रै !

केही दिने छैन्

पद ,पुरस्कार या धनदौलतले

केही समयलाई अहंकार मात्रै !

जीवनमा घटित कुराहरूलाई

प्राप्ति मान्नु सत्य ठान्नु

आँखा र मनभरिको भ्रान्ति मात्रै !

सगरमाथा चढ्नु

या अनेकन ग्रहको यात्रा गर्नु

यी सबै सत्य होइनन्

र प्राप्ति पनि होइनन्

आकस्मिकताका हिसाब मात्रै !

मृत्युका अगाडि

मानिसको अर्को कुनै

सत्य र प्राप्ति छैन

यही सत्य प्राप्तिका लागि मानिस

बाजुञ्जेल संघर्ष गरिरहन्छ !