रुद्र अधिकारी

१.

बढप्पनकाे किराेले यसरी सक्याे मान्छेलाई ।

यसले मानसिक असर गरिसक्याे मान्छेलाई ।

टेक्दै आएको धरातल बिर्सिइ सके सबैले,

देखावटी गर्ने बानी नै परिसक्याे मान्छेलाई ।

२.

आफ्नो महासागर लाग्छ अरूकाे कुलाे लाग्छ ।

आफूलाई भुसुनाले टाेके पनि बारुलाे लाग्छ ।

अरूले सुनाउँदा त्याे त केही पनि हैन भन्छन्,

संसारमा सबैलाई आफ्नै समस्या ठुलाे लाग्छ ।

३.

यो नै उसको खानदानको पहिचान हो ।

आफ्नै मानमा जम्मा हुने पूँजीको उत्थान हो ।

कसैको नम्र स्वभाव उसको कमजाेरी हैन,

उसले पाएको संस्कारले गर्ने सम्मान हो ।

४.

स्थान बनाउन नसक्दा हटाउन खोज्छन् ।

हुँदै नभएको तुजुक देखाउन खोज्छन् ।

जसलाई पौडिन आफैले सिकाइयो,

तिनीहरूले नै पछि डुबाउन खोज्छन् ।

५ .

राखेको स्थानबाट कोही खस्केपछि बुझियाे ।

विगतले कसरी पोल्छ चस्केपछि बुझियो ।

निद्रा खुल्नु र आँखा खुल्नुमा फरक रहेछ,

सपनामा झैँ विपनामै झस्केपछि बुझियाे ।