काठमाडौँ ।नेपाली भाषा, साहित्य, कला, संस्कृति, शिक्षा तथा सिर्जनशीलताको क्षेत्रमा योगदान पुर्‍याउँदै आएका स्रष्टा तथा प्रतिभाहरूलाई  नूर–गंगाप्रतिभा पुरस्कार गुठीको वार्षिक पुरस्कार वितरण गरिएको छ ।

शनिबार काठमाडौँमा आयोजित समारोहकाबीच पुरस्कार वितरण गरिएको हो ।

समारोहका प्रमुख अतिथि सम्माननीय प्रतिनिधि सभाका सभामुख डोलप्रसाद अर्यालले भाषा, साहित्य, कला र संस्कृति राष्ट्रको पहिचान तथा सामूहिक स्मृतिका आधार भएको बताउँदै यसको संरक्षण र प्रवर्द्धन राज्य, समाज र प्रत्येक पुस्ताको साझा दायित्व भएको उल्लेख गरे । “राष्ट्र केवल भूगोलले बन्दैन; राष्ट्र आफ्नो भाषा, संस्कृति, इतिहास, साहित्य र सामूहिक स्मृतिले बन्छ।” सभामुख अर्यालले भने ।

कार्यक्रममा गुठीका संरक्षक अमिर प्रताप जंगबहादुर राणाले नूर–गंगाप्रतिभा पुरस्कार गुठी केवल पुरस्कार वितरण गर्ने संस्था नभई संस्कार, सिर्जना र सामाजिक उत्तरदायित्वलाई पुस्तान्तरण गर्ने अभियान भएको बताए ।

गुठीका अध्यक्ष प्रा. डा. गोविन्द नेपालले नूर–गंगाप्रतिभा पुरस्कारले नेपाली भाषा, साहित्य, कला, संस्कृति, शिक्षा र सिर्जनशीलताको क्षेत्रमा योगदान पुर्‍याउने प्रतिभाहरूलाई निरन्तर सम्मान गर्दै आएको उल्लेख गर्दै यस अभियानलाई अझ व्यवस्थित र व्यापक बनाउँदै लैजाने प्रतिबद्धता व्यक्त गरे ।