साताका मुक्तक

                    पूर्णबहादुर श्रेष्ठ ‘हृदयङकृत’

१.

मुखले राम राम भन्नेको किन हातमा हतासो छ

के हुँदैछ थाह छैन यहाँ लौ न चारैतिर चासो छ

पाप पखाल्ने वाहानामा खुस्स मुर्ति उखेल्नेलाई

उल्टै आजकल भक्तसँग भगवानको गुनासो छ ।

२.

देशको ढुकुटी थोप्पै छैन सबै सिध्याउने भए

बाँकी केहि नराखेरै पुरै खाली रित्याउने भए

सँहदा सहँदै अति नै भयो,उठौं नेपाली जनता

हुँदाहुँदै अन्तिममा आँशु मात्रै पियाउने भए ।

३.

अब उस्को याद ,खुकुरीको धार भएको छ

कलेजी मात्रै रेट्ने खै कस्तो प्यार भएको छ

बिंर्सु भन्दा पनि कसै गरि सक्दै सकिन मैले

दिल जति मेरो चोरेर फरार भएको छ ।

४.

सम्झि रहन्छु बिगतलाई बेला बेलामा

हेरेर भबिष्यका रेखाहरु हत्केलामा

धाई राख्छु म गाउँबेसीं पापी पेट भर्न

कहिले शहर, कहिले गाउँकै मेलामा ।

५.

एउटा हातमा अर्को हात मिलाए पछि

अप्ठ्यारो पर्दा साथमा साथ मिलाए पछि

साह्रो गाह्रो सबै काम अबश्य फत्ते हुन्छ

शान्तसँग दुबैको बिवाद मिलाए पछि ।

 

६.जिन्दगी चलाउने आफ्नै तरिका हुन्छ

मान्छेको विचार अनेक थरिका हुन्छ

स्वार्थि नबसेको कुन ठाउँ होला यहाँ

रुप राम्रोभएनि पीर मनभरिका हुन्छ ।