गजल

                         प्रमुना पौडेल

उसका लागि जिन्दगीसँग हारेर आखिर के पायाै ?

मनमा उब्जिएका रहरहरू मारेर आखिर के पायाै ?

 

जुत्ता हातमा बोकि चप्पल लाएर हिँड्न बानी परेको तिमी

मेरो जिन्दगी आज घर न घाटको पारेर आखिर के पायाै ?

 

तिम्रै खुशी बचाउने प्रयासमा आफू रित्तिसके छु

देखावटी गोहीका आँसु तिम्ले झारेर आखिर के पायाै ?

 

जित्नेहरूको मात्रै इतिहास लेखिने कठै ! यो मेरो देश

हार्नेहरूको मेहनत भुइँमा पछारेर आखिर के पायाै ?

 

जब उसले एक्लोपनको कारणले आत्महत्या गर्यो

उसका लागि एक छाक नुन बारेर आखिर के पायाै ?