काठमाडौँ ।नेकपा (एमाले)का उपाध्यक्ष विष्णु पौडेलले जनतासँग टुटेको सम्बन्ध पुनर्स्थापित गर्न एकताबद्ध नेतृत्व र बलियो संगठन निर्माण गर्नुपर्ने बताएका छन् ।

मंगलबार केन्द्रीय कमिटी बैठकमा उनले निर्वाचन समीक्षा र पार्टी पुनर्गठनसम्बन्धी प्रतिवेदनले एमाले जनतासँग टाढिएको कुरा स्पष्ट पारेको बताए ।

“पछिल्लो निर्वाचनमा एमालेले पराजय बेहोरेको छ । पार्टीलाई पुनर्गठित गर्दै जनताको बहुदलीय जनवादलाई मार्गदर्शन बनाएर अघि बढ्नुपर्छ,” पौडेलको भनाइ उद्धृत गर्दै सचिव महेश बस्नेतले लेखेका छन् ।

पौडेलले सरकार संविधान र लोकतान्त्रिक मूल्य–मान्यताविपरीत चलिरहेको बताए । ट्रेड युनियन अधिकारमाथि समेत प्रहार भइरहेको उनको भनाइ थियो । सोमबारदेखि जारी केन्द्रीय कमिटी बैठकमा केन्द्रीय सदस्यहरूले धारणा राखिरहेका छन् ।