भक्तपुर ।चैत्र २१ गते शनिवार भक्तपुरमा सिर्जना अभियान समाजद्वारा आयोजित विमोचन कार्यक्रमका सभाध्यक्ष ध्रुव मधिकर्मी, प्रमुख अतिथि डा.पुष्करराज भट्ट , विशिष्ट अतिथिद्वय डा. हरिप्रसाद भण्डारी र लता के.सी . एवं कृतिकार नेउपानेले लघुकथा गान बजाउँदै कृति ‘चुनावी सेरोफेरो’ को सामूहिक विमोचन गर्नु भयो ।

कार्यक्रममा प्रमुख अतिथि भट्टले वर्तमान समयमा देखा परेका लघुकथाको प्रवत्तिबारे चर्चा गर्दै हिजोआज एकल विषयमा लघुकथाकृति लेखिने प्रचलन बढेको बताउनु भयो साथै यस्ता कृतिले वर्तमान समयको अभिव्यक्ति प्रवाह गर्ने विश्वास व्यक्त गर्नुभयो ।
कृतिको विमोचनपश्चात् विशिष्ट अतिथि डा.भण्डारीले कृतिकारलाई शुभकामना दिँदै विमोचित कृतिमाथि संक्षिप्त समीक्षा गर्नु भयो । चुनावी सेरोफेरो लघुकथाकृतिको नाम सार्थक रहेको, निर्वाचन २०८२ को दौरानमा घटेका यावत घटना र विषयलाई कृतिकारले संक्षिप्त रूपमा रोचक र मिठासपूर्ण रूपमा लघुकथाहरू उनिएको, लघुकथाका शीर्षकहरू सान्दर्भिक रहेको, आवश्यक पात्रहरूको सिर्जना गरिएको बताउनु भयो । विमोचित कृतिमा समेटिएकालघुकथाहरूमा लघुकथाका नवीतम् मान्यतामा आधारित रहेर व्यङ्ग्यभाव, प्रतीक, स्वैरकल्पना र संवादको प्रयोग, मीठो र सरल भाषा, राम्रो परिवेशमा लघुकथाहरू बुनिएको भाव व्यक्त गर्नु भयो ।

विशिष्ट अतिथि के. सी.ले कृतिकारको लेखनकला र शैलीलाई नजीकबाट हेरिरहेको बताउँदै छोटो समयमा दुईवटा कृति प्रकाशन गर्नु महत्वपूर्ण कार्य हो भन्नु भयो साथै कृतिकारलाई शुभकामना तथा बधाई दिनु भयो ।

कृतिकारले कृतिको गर्भ र पृष्ठभूमिबारे औँल्याउनु भयो ।

सो विमोचन कार्यमा विमोचित कृतिबाट शान्ता तिम्सिनाले मातृभूमि र प्रार्थना खनालले वेदना शीर्षकको लघुकथा वाचन गर्नु भयो ।

कार्यक्रमको अन्त्यमा सभाध्यक्ष मधिकर्मीले कृतिभित्र समेटिएका लघुकथाहरू चुनावी माहौलसङ्ग मात्र नजोडिएर हिजोआजको समय पनि जोडेको विश्वास व्यक्त गर्नु भयो । आयोजकका तर्फबाट सभाध्यक्षले कृतिकारलाई शुभकामना र बधाइपत्रले सम्मान गर्नु भयो ।

कार्यक्रम संस्थाका सदस्य लक्ष्मी वैद्यले सञ्चालन गर्नु भएको थियो ।