रौतहट निर्वाचन क्षेत्र नम्बर ४ का प्रतिनिधिसभा सदस्य गणेश पौडेलमाथि बिहीबार राति कालोमसी प्रहार भएको छ ।

गढीमाई नगरपालिका–७, पर्सामा आयोजित ‘जनतासँग भेटघाट’ कार्यक्रम सकेर फर्किने क्रममा उनिमाथि ‘मधेश मुक्ति अभियान’सँग आबद्ध कार्यकर्ताले कालोमसी प्रहार गरेको बताइएको छ ।

टनाको पुष्टि स्वयं सांसद पौडेलले गरेका हुन् । उनका अनुसार स्थानीय नागरिकका समस्या, मलखाद अभावलगायत विषयमा छलफल गर्न आयोजना गरिएको कार्यक्रम साँझ सुरु भएको थियो । छलफल लम्बिँदा कार्यक्रम राति करिब ८ देखि सवा ८ बजेको बीचमा सकिएको थियो ।

सांसद पौडेलका अनुसार कार्यक्रमपछि फर्किने तयारी गरिरहेका बेला मास्क लगाएका दुईदेखि तीन जनाको समूह पछाडिबाट आएर कालोमसी प्रहार गरेको थियो ।

घटनापछि प्रहरीले अनुसन्धान सुरु गरेको छ । आक्रमणमा संलग्न व्यक्तिहरूको पहिचान र घटनाको वास्तविक कारणबारे थप अनुसन्धान भइरहेको प्रहरीले जनाएको छ ।