पोखरा ।पृथ्वीराजमार्गअन्तर्गत तनहुँको व्यास नगरपालिका–३ र ४ जोड्ने मादी नदी पुलबाट शनिबार राति जिप खस्दा तीन जनाको मृत्यु भएको छ।

दमौलीबाट चापाघाटतर्फ जाँदै गरेको ग२च ५७६० नम्बरकोे जिप शनिबार राति ११ बजेतिरपुलको रेलिङ भत्काएर मादी नदीमा खसेको हो।
जिपमा पाँच जना सवार थिए।
दुर्घटनामा अन्य दुई जना घाइते भएका छन्। घाइतेहरूको दमौली अस्पतालमा उपचार भइरहेको जिल्ला प्रहरी कार्यालयका प्रहरी निरीक्षक राजु अधिकारीले जानकारी दिए।
मृत्यु हुनेमा व्यास–५ का ३५ वर्षीय प्रविन थापामगर, सोही ठाउँका २२ वर्षीय कुमार थापा र २० वर्षीय कुशल थापा रहेका प्रहरीले जनाएको छ।
उनीहरूको दमौली अस्पतालमा उपचारको क्रममामृत्यु भएको हो। घाइतेमध्ये एक जना गम्भीर रहेकाले थप उपचारका लागि पोखरा पठाउने तयारी गरिएको छ भने चालक सामान्य रहेका छन्। दुर्घटनाका घाइतेलाई नेपाली सेनाको कालीभञ्जन गण,नेपाल प्रहरी र स्थानीयले उद्धार गरेका थिए।