काठमाडौं ।साहित्यिक पत्रकार संघको आयोजनामा आज राष्ट्रिय धान दिवस एवम् दही चिउरा खाने दिनको अवसर पारेर शुभकामना आदानप्रदान गरेर मनायो ।
‘जलवायुमैत्री प्रविधि:  धानमा आत्मनिर्भरता र समृद्धिको नारा लेखिएको ब्यानरमा सम्पन्न कार्यक्रम अनौपचारिक रहे पनि केही औपचारिकता पनि कायम राखिएको थियो।

साहित्यिक पत्रकार संघका अध्यक्ष राधेश्याम लेकालीको सभापतित्वमा सम्पन्न कार्यक्रममा उपस्थित सबैजना प्रमुख आमन्त्रित व्यक्तित्वका रूपमा रहेका थिए।

कार्यक्रममा नेपालमा उज्यालो ल्याउनमा विशेष योगदान पुर्याएका उर्जा क्षेत्रमा संलग्न व्यवसायी तथा समाजसेवी राजुप्रसाद चौलागाईलाई
सम्मानपत्र प्रदान गर्दै कलाकार मदनदास श्रेष्ठले राष्ट्रिय धान दिवसको महत्त्वमाथि प्रकाश पारेका थिए। पहिले नेपालले विदेशमा धान निर्यात गर्थ्यो भने हाल आयात गर्नुपर्नुमा राजनीतिको खेल भएको उनले बताए।

सम्मानपत्र ग्रहण गर्दै राजुप्रसाद चौलागाईंले आफूलाई सम्मानित गरेकोमा खुशी प्रकट गर्दै एस.  एस. फाउन्डेसन र समाजसेवी सोभित उप्रेती तथा साहित्यिक पत्रकार संघप्रति आभार प्रकट गरेका थिए।
कार्यक्रममा आफ्नो स्वागत मन्तव्य राख्दै सापसका अध्यक्ष राधेश्याम लेकालीले असार १५ गते शीर्षकको एउटा कविता वाचन गरेर सुनाएका थिए।

साहित्यिक पत्रकार संघका पूर्व अध्यक्ष कवि नरेन्द्रबहादुर श्रेष्ठले पनि धान रोपाइँकै बारेमा लेखिएको कविता वाचन गरेर सुनाएका थिए।

कार्यक्रममा गायिका रितु कंडेलले असारे गीत तथा जनकविकेशरी धर्मराज थापाको ‘हो हो माले हो’गीत र गीतकार सुभाषचन्द्र पौडेल’भीमफेदीया’द्वारा रचित गीत ‘मायामा ढुङ्गा पनि गल्दोरहेछ’ गाएर सुनाएकी थिइन्।