काठमाडौं । क्यानडाले आईसीसी क्रिकेट विश्व लिग–२ अन्तर्गतको त्रिकोणात्मक एकदिवसीय अन्तर्राष्ट्रिय शृंखलामा  घरेलु टोली ओमानविरुद्ध ५८ रनको जित निकालेको छ ।

जारी शृंखलामा क्यानडाको यो पहिलो जित हो । यसअघि क्यानडाले ओमान र नेपालसँग हार व्यहोरेको थियो ।

यता, ओमानको यो लगातार दोस्रो हार हो । यसअघि क्यानडालाई हराएको ओमान नेपालसँग पराजित भएको थियो ।

बिहीबार अल अमिरेत रंगशालामा क्यानडाले प्रस्तुत गरेको २५७ रनको लक्ष्य पछ्याएको ओमान ४६.३ ओभरमा १९८ रनमै समेटियो ।

ओमानका हम्माद मिर्जाले ४९, हसनैन उल वाहबले २९,  हसनैन शाहले २७, जय ओडेदराले अविजित १८, जतिन्दर सिंह र नदिम खानले १३–१३, कप्तान विनायक शुक्लाले ११ र मुजिबर अलीले १० रन बनाए ।

क्यानडाका जाहिद शिर्जाद र सहिल पटेलले तीन-तीन, कलिम सानाले दुई तथा हर्ष थाकरले एक विकेट लिए ।

त्यसअघि टस जितेर ब्याटिङ रोजेको क्याडानले निर्धारित २० ओभरमा सबै विकेट गुमाएर २५६ रनको योगफल तयार पारेको थियो ।

क्यानडाका समित गोहेलले सर्वाधिक ६७ रनको योगदान गरे । उनले ८५ बलमा पाँच चौका प्रहार गरे । यसैगरी, आदित्य वर्दराजनले ५५, कप्तान हम्जा तारिकले अविजित ३७, ओरोन जोनसनले ३३, सहिल पटेलले २० र हर्ष थाकरले १३ रन बनाए ।

ओमानका हसनैन शाहले तीन, जय ओडेदरा र मुजिबर अलीले दुई–दुई तथा सकिल अहमद, नदिन खान र करण सोनावालेले एक–एक विकेट लिए ।

जितसँगै क्यानडाले नेपालमाथि दबाब बढाएको छ । टोलीले नेपालसँगको दूरी घटाएर एक अंकमा झारेको छ ।

हाल क्यानडा ३५ खेलबाट २७ अंकका साथ सातौँ स्थानमा छ । एक खेल कम खेलेको नेपाल २८ अंकका साथ छैटौँ स्थानमा छ ।

पराजित ओमान ३१ खेलबाट ३३ अंकका साथ चौथो स्थानमा छ ।

अब क्यानडाले शनिबार र ओमानले सोमबार नेपालको सामना गर्नेछन् ।