काठमाडौँ । डेविड मलानको अर्धशतक र बलरहरूको उत्कृष्ट प्रदर्शनमा चितवन राइनोजले नेपाल प्रिमियर लिग (एनपिएल) सिजन–३ को पहिलो खेलमा विराटनगर किंग्सलाई ८ रनले पराजित गरेको छ।

त्रिवि क्रिकेट मैदानमा मंगलबार भएको खेलमा १५८ रनको लक्ष्य पछ्याएको विराटनगर १९.३ ओभरमा १४९ रनमा अलआउट भयो।

विराटनगरलाई जितका लागि अन्तिम ५ ओभरमा ५४ रन चाहिएको थियो। क्रिजमा आन्द्रे रसेल रहेकाले विराटनगरको जितको सम्भावना कायम थियो। तर १६औं ओभरको पाँचौं बलमा रसेल आउट भएपछि विराटनगरको इनिङ्स एकाएक धराशायी बन्यो।

रसेलले १७ बलमा ४ छक्का र १ चौकाको मद्दतले ३३ रन बनाए। उनी कमल ऐरीको बलमा देव खनालको हातबाट क्याच आउट भए। त्यसपछि विराटनगरले नियमित अन्तरालमा विकेट गुमाउँदै खेल चितवनलाई सुम्पियो।

१५८ रनको लक्ष्य पछ्याउने क्रममा विराटनगरले आक्रामक सुरुवात गरेको थियो। ओपनर लोकेश बम र इमरान शेखले पहिलो विकेटका लागि ४० रनको साझेदारी गरे। लोकेशले १४ बलमा २६ रन बनाए। उनको इनिङ्समा ४ चौका र १ छक्का समावेश थियो।

लोकेश चौथो ओभरको अन्तिम बलमा आउट भएपछि इमरानले श्रीलंकन ब्याटर चरिथ असलंकासँग इनिङ्स अघि बढाए। असलंका ९ बलमा ८ रन बनाएर आउट भए। इमरानले भने ३१ बलमा ३९ रन बनाए। उनले ४ चौका र २ छक्का प्रहार गरे।

१०.५ ओभरमा ८७ रन हुँदा इमरान आउट भए। त्यसको एक ओभरपछि विराटनगरले बासिर अहमदलाई पनि गुमायो। बासिर १३ बलमा १३ रन बनाएर आउट भए।

त्यसपछि एन्जेलो म्याथ्युज र रसेलले पाँचौं विकेटका लागि ४३ रन जोड्दै विराटनगरलाई खेलमा फर्काउने प्रयास गरे। म्याथ्युज १६ बलमा १४ रन बनाएर आउट भए। त्यसपछि रसेलले आक्रामक ब्याटिङ गरे पनि उनको विकेटसँगै विराटनगरको जितको सम्भावना कमजोर बन्यो।

विराटनगरले १५.५ ओभरमा रसेलको विकेट गुमाउँदा १३२ रन बनाएको थियो। त्यसपछि टोलीले २३ बलमा १७ रन जोड्दा बाँकी पाँच विकेट गुमायो।

१७.५ ओभरमा म्याथ्युज आउट भए। त्यसको अर्को बलमा रुपेश सिंह खाता नखोली आउट भए। १८.२ ओभरमा प्रतिश जिसी र १८.४ ओभरमा कप्तान सन्दीप लामिछाने आउट भएपछि विराटनगरले १४२ रनमै नौ विकेट गुमाइसकेको थियो।

१९औं ओभरको पाँचौं बलमा रिजन ढकालको बलमा नरेन साउदको क्याच देव खनालले छुटाए। उक्त समयमा विराटनगरको अन्तिम विकेट बाँकी थियो। क्याच समात्न सकेको भए चितवनले त्यही ओभरमा खेल जित्ने थियो। तर जीवनदान पाएका नरेनले अन्तिम ओभरसम्म खेल लम्ब्याए।

अन्तिम ओभरमा विराटनगरलाई जितका लागि १४ रन आवश्यक थियो। टम टेलरको बलिङमा शुभम रन्जनेले पहिलो बलमा चौका प्रहार गर्दै आशा जगाए। तर उनी तेस्रो बलमा बोल्ड भए। रन्जनेले ११ बलमा १० रन बनाए। उनको विकेटसँगै विराटनगरको इनिङ्स १४९ रनमा समाप्त भयो।

चितवनको जितमा कमल ऐरीले उत्कृष्ट बलिङ गरे। उनले ४ ओभरमा २६ रन खर्चिएर ४ विकेट लिए। उनले बासिर अहमद, एन्जेलो म्याथ्युज, रुपेश सिंह र आन्द्रे रसेललाई आउट गरे।

रिजन ढकालले ३ ओभरमा २५ रन खर्चिएर २ विकेट लिए। उनले प्रतिश जिसी र कप्तान सन्दीप लामिछानेलाई लगातार अन्तरालमा आउट गर्दै विराटनगरलाई दबाबमा पारे। उनको बलमा नरेनको क्याच छुटे पनि चितवनले खेल आफ्नो पक्षमा पार्न सफल भयो।

टम टेलरले २.३ ओभरमा २३ रन खर्चिएर १ विकेट लिए। रन्जित कुमार, ड्यान माउस्ली र मौसम ढकालले पनि समान १–१ विकेट लिए। रन्जितले ४ ओभरमा १५ रन मात्रै खर्चिएर किफायती बलिङ गरे।

यसअघि टस जितेर विराटनगरले फिल्डिङ रोजेपछि पहिले ब्याटिङ गरेको चितवनले निर्धारित २० ओभरमा ३ विकेट गुमाएर १५७ रन बनाएको थियो।

चितवनका लागि डेविड मलानले सर्वाधिक ७० रन बनाए। उनले ५० बलमा ५ चौका र ५ छक्का प्रहार गरे। मलानले देव खनालसँग पहिलो विकेटका लागि ५८ रनको साझेदारी गरेका थिए। देव १५ बलमा १२ रन बनाएर आउट भए।

अर्जुन साउद ९ बलमा ३ रन बनाएर आउट भएपछि मलानले कप्तान रवि बोपारासँग इनिङ्स अघि बढाए। तर १२.२ ओभरमा ९० रन हुँदा मलान रसेलको बलमा बोल्ड भए।

त्यसपछि बोपारा र ड्यान माउस्लीले अविजित ६७ रनको साझेदारी गर्दै चितवनलाई सम्मानजनक योगफलमा पुर्‍याए। बोपाराले २६ बलमा ३२ र माउस्लीले २२ बलमा २९ रन बनाए।

विराटनगरका लागि रसेलले ४ ओभरमा ३९ रन खर्चिएर १ विकेट लिए। चरिथ असलंकाले ३ ओभरमा १८ रन खर्चेर १ विकेट लिए भने एन्जेलो म्याथ्युजले ३ ओभरमा १५ रन खर्चिएर १ विकेट लिए।