यस वर्ष फ्रान्सले दोस्रो विश्वयुद्धपछिको कुनै पनि समयभन्दा बढी डढेलोको क्षति बेहोरेपछि आगलागीको कारणबारे बहस चर्किएको छ।

भीषण गर्मी, लामो खडेरी र जलवायु परिवर्तनका कारण आगो फैलिन सहज बनेको भए पनि फ्रान्सेली अधिकारीहरूले अधिकांश डढेलो मानिसकै गतिविधिबाट सुरु भएको बताएका छन्।

फ्रान्समा भएका डढेलोमध्ये करिब १० मध्ये नौ वटा मानिसकै कारण सुरु भएको अभिलेखले देखाएको छ। यही आधारमा सरकारले आगजनी वा लापरवाहीबाट आगो लगाउनेहरूमाथि कारबाही तीव्र बनाएको छ। तर यति ठूलो संख्यामा पक्राउ गरिएको विषयमा कानुनी विज्ञहरूले भने प्रश्न उठाएका छन्।

फ्रान्सको आन्तरिक मन्त्रालयका अनुसार जानाजानी वा दुर्घटनावश आगलागी सुरु गरेको आरोपमा ४२० जना पक्राउ परेका छन्। पक्राउ पर्नेमा १६६ जना नाबालिग छन्।

दक्षिण–पूर्वी फ्रान्सको वार क्षेत्रमा एक २३ वर्षीय पुरुषले पाँच दिनको अवधिमा जानाजानी १० वटा आगो लगाएको आरोप लागेको छ। दोषी ठहरिएमा उनलाई १५ वर्षसम्मको जेल सजाय र १५०,००० यूरोसम्म जरिवाना हुन सक्छ।

केही अभियुक्तलाई पक्राउपछि छिट्टै मुद्दा चलाएर सजायसमेत सुनाइएको छ। भोसज क्षेत्रमा पर्ने राओन–ला–उएटापे जंगलमा तीन पटक आगो लगाएको आरोप लागेका एक व्यक्तिलाई तीन वर्षको जेल सजाय सुनाइएको छ। घटनामा केही वर्गमिटर वनस्पति मात्र जलेको बताइएको छ।