काभ्रे ,पनौती। पनौती नगरपालिका,न्यायिक समितिको आयोजनामा उत्कृष्ट मेलमिलापकर्ताहरुलाई पु्रस्कृत गरियो ।
उपप्रमुख गीता बन्जाराको अध्यक्षतामा सम्पन्न पु्रस्कार वितरण कार्यक्रममा नगरभरिका मेलमिलापकर्ता मध्ये महिला तर्फ वडा नं १२ का मिरा खत्री र वडा नं.४ का अक्कलसिंह थापा पुरस्कृत भए । जनही ४हजार ४सय ४४ रुपैयाँ नगद,प्रमाणपत्र र दोसल्ला ओढाए सम्मान गरिएको थियो ।

उनीहरुलाई नगरप्रमुख रामशरण भण्डारी,उपप्रमुख गीता बन्जारा,प्रमुख प्रशासकीय अधिकृत रामप्रसाद आचार्य र न्यायिक समिति सदस्य महेन्द्रलाल श्रेष्ठसहितले सम्मान गरे ।

नगरप्रमुख भण्डारीले पुरस्कृत हुनुहुने मेलमिलापकर्ताद्धयलाई बधाई दिदै नगरभित्र मेलमिलापकै कारण विवादहरु कम आइपुगेकोमा मेलमिलापकर्ताहरुलाई धन्यवाद दिए । साथैै नगरले सञ्चालन गरेका वडा स्तरका विभिन्न योजना आयोजनाहरु सहजीकरण गरिदिन पनि मेलमिलापकर्ताहरुलाई अनुरोध गरे ।

उपप्रमुख बन्जाराले मेलमिलापकर्ताहरुले सम्बन्धित वडा कार्यालयसँग समन्वय गर्दा विवाद समाधानमा सघाउ पुग्ने विश्वास व्यक्त गरिन ।
यसैगरी प्रमुख प्रशासकीय अधिकृत आचार्यले स्थानीय विवादहरुमा सहजीकरण गर्न सफल भएकोमा मेलमिलापकर्ताहरु धन्यवादका पात्र भएको बताउँदै आगामी दिनमा पनि नगरले मेलमिलापकर्ताहरुबाट यस्तै अपेक्षा राखेको भनाई राखे ।

नगरपालिकामा सूचिकृत मेलमिलापकर्ताहरुको उपस्थितिमा भएको सो भेलामा न्यायिक समितिका सदस्य महेन्द्रलाल श्रेष्ठले स्वागत मन्तब्य राखे । उक्त कार्यक्रमको सञ्चालन उजुरी प्रशासक रमेश थापाले गरेका थिए ।